Вчера, на 8 ноември на Филолошкиот факултет „Блаже Конески“ во Скопје се одржа Меѓународна научна конференција „Луан Старова – писател и истражувач“.
На свеченото отворање на конференцијата, поздравна реч одржа проф. д-р Биљана Ангелов, ректор на Универзитетот „Св. Кирил и Методиј“, а со поздравни говори се обратија и проф. д-р Владимир Мартиновски, декан на Факултетот, проф. д-р Исмет Осман раководител на Катедрата за албански јазик и книжевност, проф. д-р Јоана Хаџи Лега раководителка на Катедрата за романистика, беседа за Луан Старова одржа академик Влада Урошевиќ, а поздравни говори одржаа и академик Абдулменаф Беџети и проф. д-р Скендер Хасани.
На свеченото отворање на конференцијата беше истакнато значењето на творештвото и дејноста на академик Луан Старова и неговата општествено-дипломатска и културно-научна мисија.
За поширокото значење на Старова, ректорката Биљана Ангелова истакна: „Академик Старова изврши голема мисија за нашата културна и општествена афирмација во светот, не само преку своите извонредни и монументални дела, туку и преку сета своја дејност на мислител, двигател, културен деец, истакнат општественик од кого истекуваа ‘златни реки’ пораки и поуки оти беше вистински визионер со јасно поставена мисија.“
Во својата поздравна реч ректорката Ангелова нагласи: „Старова останува грамадник, златоврв, еден од столбовите на нашиот подем, културен, преку мисија на подадена рака кон светот и неговите врвни сецивилизациски вредности. Човек-институција, врвен автор, дејственик и мисионер, пред кој Универзитетот Св. „Кирил и Методиј“, не само денес, туку секогаш се поклонува со респект, бидејќи до недоглед, на најубав начин ја претставуваше врвната филологија, беше и остана симбол за сјаен творечки триумф, наш триумф и подем во светот, а нам, на сите по него или тие што беа до него – на маестрален начин – ни го покажа патот.“
Ректорката на УКИМ, проф. д-р Биљана Ангелова заклучи: „Академик Луан Старова е грандиозен автор на светската „мапа“ кој ја афирмираше нашата книжевност и култура во светот, и како автор, и како универзитетски професор и научник, и како угледен амбасадор, дипломат од висок ранг. Репрезентативен, со извонредна мисија за афирмација на македонската книжевност, наука и култура во светот, автор полиглот кој твореше на извонреден: албански, македонски и француски јазик.“
На Меѓународната конференција беа изложени 23 реферати кои се осврнаа на творечкиот и научно-истражувачкиот опус на академик Луан Старова. Со тоа Филолошкиот факултет „Блаже Конески“ и УКИМ достојно ја одбележаа творечката и научноистражувачка дејност на академик Луан Старова, еден од столбовите на нашата наука, култура и дипломатија.академик Луан Старова, еден од столбовите на нашата наука, култура и дипломатија. |
