Универзитетот „Св. Кирил и Методиј” е формиран во 1949 година со три факултети, денес тој претставува заедница на 23 факултети, 10 научни институти и други институции.

Сликата на Универзитетот „Св. Кирил и Методиј” во Скопје, конкретно, може да се претстави низ следниве бројки: во наставно-образовниот процес на сите факултети се вклучени над 36.000 студенти од Република Македонија, како и повеќе од 700 странски студенти; над 2.300 наставно-научни и соработнички кадри учествуваат во изведувањето на наставно-образовниот и научниот процес на факултетите и над 300 научни и помошнонаучни кадри на институтите.

Во досегашниот развој на Универзитетот се создадени над 100.000 високостручни кадри, околу 5.000 магистри и над 2.000 доктори на науки од сите наставно-научни области.

Во вкупната дејност на Универзитетот посебен белег имаат спортските, уметничките, информативните, рекреативните и други активности организирани во разни друштва, сојузи, клубови и слично.